Mark 10

aarakwáꞋó tasáén-aimbo siráin-kwasai.

Mátíyu 19:1-12, Árúku 16:18

1Ísu minkáꞋá tuwéna Yútiyaa-ayampaꞋa Yótáni-nonkona menávápáꞋá komáyowasa moórágwaraꞋa sáwíva-kwaasi torupowaná kéꞋnaamba aaí kwésimatimuwasa 2ámáán-kawaa-kwaasi sésa sáwí-aimbo sínda isánáe sésa ÍsunopaꞋa tésa sésa moórá-kwaasigo awainínkómbá kanaarárá auwáníyo. mirámó énamo éna ámáán-aimba karáni. íya karáníyo suwaná 3naaóváꞋá Mósesi nóra-amaana simátímakaiyo séna tísaa úwasa 4miwí sésa Mósesi maará séna moóráwai awainínkómbá aiꞋmátuwaindawai aúváívimba agaimaréna séna kesuwainímbá aiꞋmátuwaumne séna agaimái amiíno siráiye suwaná 5Ísu séna kentíkwáꞋná tirumbá makáamba pósa Áánútun-aai íma ísóntavai mindáyavai Mósesi minámáámbá siráimbanivo 6Áánútu kwíyómba maramá taróruronkaꞋa íma mirá siráivo Áánútu aaraigwárá kwaaigwáráꞋá taróruraiye. 7miráumai taróruraintavai tinóvowi tiyuwésa awaikóe awainínkóe tágárotamai 8mimbórá-túmá maꞋmái kwémaewe. mindáyavai awaikóe awainínkóe íma kae-kwáásíráámbá ésa mimbóráíꞋa kwéowe 9Áánútu aarai-kwaaí moóráiꞋa umátínkaraintavai íma tasáéro Ísu siráiye.

10Ísu simásuwena naaúmpaꞋa umésa kwená kwayó-kwáásí Ísumo sún-aintavesa áísaa uwaná 11séna moóráwaimo awainínkómbó aiꞋmátuwenamo óꞋon-inimbo kwémayaimba umóyámbá kwémayaiye. 12moórá-ininkomo awaikómbó auwénamo óꞋonkwambo kwémayaimba umóyámbá kwémayaiye Ísu siráiye.

Ísu iyámpói kaweꞋá umátínkarain-kwasai.

Mátíyu 19:13-15, Árúku 18:15-17

13Ísu simátimuwasa évakarawai Ísu tátorena kaweꞋá umátinkainkwae sésa iyámpói tíꞋmaesa tuwasá kwená kwayó-kwáásí sésa tíꞋmaeꞋa kóro suwaná 14Ísu tuwánéna áwááꞋa tiyéna séna íma kóro séꞋa tiyuwáíyasa kesópaꞋa iyámpói úwoi teró. miníyámpóí kesópaꞋa tentembá Áánútu kwená kwaási kawááimba miráráán-umai kwégawaaimba iyámpói kesópaꞋa tí-amba íma ítátinkaaro. 15áraiꞋa simátimeꞋa séꞋa Áánútuntavesamo sésamo iyámpóíraan-umai kenkáꞋá kwégawaa-onemo síyanamo éna miwíráꞋá kawááinivo ímo mirámó síyawaimo éna íma kawááiniye Ísu séna 16miníyámpóíyómbá tiránkena tineꞋá tátorena kawer-áímbá simátímakaiye.

óísankwara-kwaasigona kwaasái.

Mátíyu 19:16-30, Árúku 18:18-30

17Ísu simátimena kwéguwana moóráwai isaaiséna Ísu anóndakoman-iye séna takívairena séna kaweꞋnáꞋá óne. nóra umáíya aúnáiꞋa umái kwíyómpaꞋa maíꞋmaira ónaumno súwana 18Ísu séna kentáváí nóra séwa kaweꞋnáꞋá óne kwéseno. mimbóráwáí Áánútu kweyáá kaweꞋnáꞋán-iye. 19Áánútuna ámáámba áꞋa ísaraane. minámáámbá aúváívinkemba agaimaréna séna kwaási tínkamiyasamo puwónááoniꞋa íma oró. íma aarai-úmóyámbá oró. íma umóyámbá máyáaro. íma kampar-áímbá simátínkáaro. kwakaráí-áímbá íma seró. kentinóvowi túwíꞋa anómba oró siráiye súwana 20mindákó séna minámáámbá kesí iyámpóírakemba ísareꞋa póꞋa kaweꞋá úmae kwéiyune súwana 21Ísu awánéna aamoí éna séna kaweꞋá éma moórá-yantaaꞋa íma kaweꞋá uráampo ená náaindaamba óꞋon-kwaasi kwétime óntamba mairé ímo makéwai tímatuwenana ená kaweꞋ-méyámbá Áánútu kwíyómpaꞋa ankáníye. tímatuwemo e kesínaaemba kwaráníyone súwana 22mináímbá iséna sáwívaꞋ-naindaamba makóntavai kanagíꞋá túmaena anón-imayaa úwana arunkó sáwíꞋa kwéuwana kuráiye.

23kúwana Ísu kwanténa kwená kwayó-kwáásíyávéna séna sáwívar-oisambo makén-kwaasi Áánútumo kwená kwaási kawááipaꞋa kwíyamba umbaí táníye súwana 24kwená kwayó-kwáásí mináíntáváí tááꞋa kówana kesí iyámpóíyono. óísan-imayaamo eémáyaiyawaimo Áánútumo kawááipaꞋo kwíyamba umbaí táníye. 25moórá-poigo áwíꞋa káámeri mimpóígó kwaigóná avaapimbá íma kanaán-umai kóveraniye. káámeri-poigomo kwaigóná avaapimbó kóverainkakai sáwívar-oisamba makén-kwaasi Áánútu kawááipaꞋa kosinó súwasa 26mináímbá isésa táátavai ésa sésa umbaí taintáváí nóran-kwaasiya Áánútu kawááipaꞋa ménaaoo suwaná 27Ísu tuwánéna séna kwaási miwítí mayáínéí íma meéyámbaresa kónááovo Áánútu amápa-tantaaꞋa úwoi kanaán-umai kwéiye súwana 28Pítaa séna isaaó. kentáásí amápa-tantaaꞋa tuwéta enánaaemba kwégwaraumne súwana 29Ísu séna áraiꞋa simátimeꞋa séꞋa kentáváí imáyáa ésa Áánútuna áséi-aimba kosimátimenaaontavesa naambáruꞋa tuwésa tuwaaísái tiyuwésa tíváꞋmaaꞋa tiyuwésa tímánaaꞋmaaꞋa tiyuwésa tinóvowi tiyuwésa táánimbaaꞋa tiyuwésa tiyáámúmbaaꞋa tiyuwésa miwítí maramá túwáawaina anondáma 30marapáꞋó máyáankaꞋa túwáan-tantaaꞋa mirán-tántááꞋá sáwívaꞋa mémaesa tuwaaísái-iꞋa ésa tímánaaꞋmaariꞋa ésa tinóisai-iꞋa ésa kentí iyámpóí-iꞋa ésa naambá maramá mayánááomba miwívímbá umbai-yántááríꞋa umátinkanaaombo ésa naaén-kanaa aúnáiꞋa umái kwíyómpaꞋa maíꞋmaiꞋa ónááowe. 31ívéꞋa évakaꞋa aivakéwáí aáno tínaaeniꞋa íyasa ívéꞋa évakaꞋa tínaaenkewai aáno aivaríꞋa ónááowe Ísu siráiye.

Ísu kwemó puwíníntavai siráin-kwasai.

Mátíyu 20:17-19, Árúku 18:31-34

32Ísu séna Yérúsaremu-naopaꞋa kónáe séna aampaꞋá kwégwesa Ísu aivaꞋá kúwana kwená kwayó-kwáásí tááꞋa kówana tínaaembo kun-kwáásígwáráꞋá tááꞋa kówana Ísu kwená kwaási sísamaivakemba kaeꞋá kumbaimái-kwaasi tíꞋmaena moórá-ayampaꞋa tínkarena kwempáꞋó tínín-tantaakontavai mósimatimena 33séna maísáaro. Yérúsaremu-naopaꞋa konanayá moóráwai kembá kwaási úrandakomba mono-káwáá-kwáásíyé ámáámba sen-kwáásíyé agaráátinkainasa kembó sínkami-aimba simái tarúmaresa síꞋmai óꞋonkaa-kwaasi timíyasa 34kanaárááꞋa kwésinkesa tuwirááíma kwisinkésa súwírukuꞋa kwénesa sínkamiyaꞋa púwónasa utamásinkaiyaꞋa kaumbo-táwai maisuwéꞋa usásinanaumne Ísu siráiye.

Yémésiye Yóniye Ísumba áísaa urááyan-kwasai.

Mátíyu 20:20-28

35minkánáá Sépéti ááninkorasarai Yémésiye Yóniye ÍsunopaꞋa tésarai sésarai anóndakoo áísaa oyaníꞋa umásinkaniyono suyaná 36nóintavai kwétinkainara umátinkanaumno súwasarai 37ená ságayam-barupaꞋo umaéma kenkáí usásisinke évarevar-akwampaꞋa sinkáníyone suyaná 38Ísu séna séyan-ainkona ááimba íma ísaraaiye. sáwí-nombo anavéúmpinkembo náúndanten-umai síꞋa índaiꞋa umásinkanaaomba keinárai kanaarárá kemó náúnda-anaveumpinkemba náyááoiyo. síꞋo índaiꞋo umásinkanaaontemba kanaarárá keinárai mirá umátinkanaaoo súwasarai 39keiráí kanaám-pókai mayáyauye suwaná Ísu séna áraiꞋa séye. kemó náúnda-anaveumpinkemba náyááoiye. síꞋo índaiꞋo umásinkanaaontemba keinárai mirá umátinkanaaovo 40kesí évareva-sukwampaꞋa kemá íma usásintinkanaumpo Áánútu kaeꞋnárai umátínkaraimba póna usásintinkaniye súwasa 41Ísuna kwayó-kwáásí siyáánkainarawaꞋa mináímbá isésa Yémésinte Yóninte áwááꞋa tíyúwana 42Ísu tááyowasa tuwaná séna áꞋa ísaraawe. marapár-ánón-kwáásíyómbá usáyaaitamai asirayán-áímbá simáti simati kwéuwasa kwenkóyai kwentáyaiꞋa uráawe. 43anón-kwaasimo ontembá keinárawaꞋa íma mirá oró. keinárawapinkemba usáyaaitanae síyawai óꞋowiti kwayóꞋá maránááowe. 44keinárawapinkemba aivaríꞋa ónáe síyawai amáparawaiti mayáímá túwaꞋnaa oro. 45kemá kwaási úrandako kumpaáruraundawai íma súwaꞋnaa ígwáeꞋa kunkáumpo kemá kwaási túwaꞋnaa ónáeꞋa kunkáumne. sáwí-imayaavinkemba iyátinkanaundayavai puwónaumne Ísu siráiye.

Ísu aúramba kavíkówaimba kaweꞋá umánkarain-kwasai.

Mátíyu 20:29-34, Árúku 18:35-43

46Ísuwe kwená kwayó-kwáásíyé Yéríko-noapaꞋa kumbá sáwíva-kwaasigwaraꞋa mindáópaꞋa tuwésa aampaꞋá kuwaná Tímíyási ááninko áwíꞋa Páátímiyasi aúramba kavíkówai óntamba inaai simái mayánáe séna aanéivaꞋa kumbéna kwéinaai súwasa 47évakarawai sésa Ísu Násáretivakewai kwétiye suwaná iséna anónkaꞋa séna Ísuwo Tévítin-andarakewai ómpo arumbá umásinkaao súwasa 48sáwívarawai áwááꞋa aéésa sésa aaiseraaó suwaná mináímbá ivá kwétuwena óꞋomba anónkaꞋa séna Ísuwo Tévítin-andarakewai ómpo arumbá umásinkaao súwana 49Ísu aampaꞋó kweémáyomba kwená egwaaꞋá kousásinena séna ááyaaro súwasa aúrambo kavíkówaimba ááyesa sésa enarunkó kaweꞋá íno. kwéaayaivo usásinaao suwaná 50aꞋmarénamo máyon-ampaanta agwáímarena usásinena Ísun-aókáꞋá túwana 51Ísu séna nóin-tantaara embó arááímo táínda-yantaaꞋa umánkanaumno súwana anóndakoo súramba kaweꞋá umásinkainkwaeꞋa úne súwana 52Ísu séna kentáváí kanaán-umai súwaꞋnaa íníwaiman-iye sénda póꞋa kaweꞋá umánkaumpo kwaaó súwana avekáámbá aúramba awánéna Ísun-ánaaemba kwakáiye.